Long aste, retired Papua New Guinea Defence Force Lieutenant Colonel Geoffrey Key, i em i sanap tu long wanpla seremoni long Port Moresby long lukim pinis blong wanpla longpla 1,200 kilometre wokabaut blong sampla PNGDF soldia.
Displa Exercise Antap Long Ol 2025 wokabaut em oli bihainim wokabaut we em yet ibin lidim sampla soldia longen taim em ibin wanpla yanpla Captain long 1975 from Moem Baracks long Wewak, East Sepik igo olgeta long Port Moresby.
Long displa wokabaut long 1975, Captain Key na ol soldia blong em oli wokabaut from Wewak igo olgeta inap oli kamap long Port Moresby insait long 46pla dei, tasol long displa re-enactment exercice ol soldia ibin wokim long relay pasin wantaim ol narapela soldia.
Retired Lt Colonel Key itokim ABC niusmeri Theckla Gunga aste olsem displa wokabaut inobin isi, tasol ol komuniti long ol ples oli wokabaut longen ibin givim sapot...na em ibin igat strongpla tingting long ol imas karim aut oda blong komanda blong ol.
Letter oli bringim long go givim long Chief Minista long taim ia, Michael Somare em blong sapotim independence blong Papua New Guinea long 16 Septemba 1975.
Em ia Theckla em i stori wantem retired Lt Colonel Geoffrey Key long displa seremoni aste taim PNGDF Commander, Rear Admiral Philip Polewara i kisim batton we letter istap insait.
Credits
Image Details
Ol soldia iwokabaut long East Sepik provins igo long Port Moresby